حلم بنت صغيرة


images

كان في بنت زغيرة مرصودة بغرفة ضيقة على الروح ومعتمة بقلب برج عالي مابيدخل الضو بقلبو. مافي غير طاقة زغيرة كتير بيفوت منها عمودين أو تلاتة من ضو الشمس كل صبحية. البنت كانت دائما تنام على فرشة من القش مفروشة عالأرض بالمكان اللي بيطل عليه ضو الشمس. كانوا حيطان الغرفة دفتر رسم ملون بخدوش بيضا، وكان المسمار العتيق اللي لقتو بزاوية من الزوايا هو القلم اللي بتخربش فيه عالحيطان. الحيطان كان عليها كتابات ورسمات كتير تركوها كل البنات الزغار اللي سكنوا بالغرفة لآلآف السنين. كان في صور عصافير وقطط وبطات ووردات، وكان في كتابات عن الحلم وعن أمانيهن انهن يشوفوا امهن وابوهن ويشترو لعبه جديدة. وكان في سور من القرآن، وكان في اشعار قديمة وجديدة، أغاني، ورسائل لكل اللي بدهن يسكنوا بالغرفة من بعدهن.

أكتر شي كانت تحبو هي البنت الصغيرة هو لما تغمر الشمس وشها وهي نايمة، وتفتح عيونها تلاقي الوهج أخدلها ياهن لمكان حلو كتير، لصفحة بيضا نضيفة واقلام ملونه، امها وابوها ماسكين ايديها قدام البيت عم يتكركرو. شعراتها مجدلين عالطرفين وخدودها زهر. البيت الو اسطوح مثلث وشباك مدور متل شباك هايدي بتطل منو الصبح عالمروج اللي مابتخلص، مزينه بوردات زنبق هون وجوري أحمر هونيك. وفي قطة كبيرة قد نص البيت والها ٦ رجلين، هي القطة بتحكي كمان. وفي غيوم عم تضحك وتلعب مع بعضها. في نجوم معلقة بخيطان بالسما. وفي عصافير حمر بيحبو يلعبو معها ومع القطة. والشمس عم تغني.

كانت البنت الزغيرة عم تحلم وتخربش عالحيط لما فجأة بيقطع سرحانهابالحلم – اللي هو أقرب من الواقع لقلبها- صوت مفتاح عم يقرقع بقلب قفل الباب الحديدي. اجا المسخ ابو العوافي مغطى بالطحالب والطين، ولازقة عليه شغلات معفنة متل كياس بلاستيك وقشر جلدو عم يوقع. عيونو التنتين سود متل قلبو، بشرشرو قطران وزرنيخ.

البنت الزغيرة ماخافت، كملت الرسالة اللي بدها تبعتها. ورجعت عطت عيونها للوهج لياخدهن بعيد بعيد. على طول.

كانت كاتبة عالحيط: الضو كان عايش بقلبي على طول، بس ماشفتو الا لما صرت بالعتم.

About Hummingbird

Feels strange when I talk about myself. It is just me.
This entry was posted in Literature, Syria, عربي and tagged , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s